Friday, October 31, 2014

Toys to Survive the First Six Months with Your Baby أكتر العاب ريحتني من عمر ٠-٦ شهور

اليوم حتكلم عن الألعاب الي سوت فرق فحياتي مع بنتي فالستة شهور الأولى
محد قلي أو نصحني بيها
أنا وصلت للي وصلتله من التجربة

١ـ المرجيحة
مهمة مهمة مهمة لأبعد الحدود
تريح البيبي وينام ويحس فيها براحتو
ولاتعودهم عالشيل ولا شي
فالشهور الأولى البيبي ما يسوي ولا شي فمن الأشياء القليل الي تشغلهم المرجيحة

اختيار المرجيحة صعب لأنو في فرق فالمزايا والأسعار
أنا طبعا نسيت إني عايشة فجده فدخلت أون لاين ونقيت كم موديل وبدأت ألفلف

رحت
Mother Care ، Centre Point، Mamas and Papas ، Toys are Us ، Early Learning Centre
وما لقيت الي ابغاه
أحسن شي لقيته هيا هادي المرجيحة الي فالصورة

فالنهاية حبيتها لأنها بالبطارية فكنت آخدها بيت حماتي وبيت أهلي كمان خفيفة و تتطبق

بس في اكتشفتو متأخر أنه سنتر بوينت الي على شارع الأمير سلطان فيه تشكيلة كبيرة وكل الي كان نفسي فيه لقيته هناك



٢- البلاي مات
هذا مرررررة مهم عشن البيبي لازم يتعود يكون عالأرض لأنه لازم بعد فترة يحاول يقلب و يتحرك
كمان شوية شوية يبدأو يحاولو يمسكو الألعاب الي فيه
أنا أخدت حقي من مذركيز وأخدت من الألعاب الي تتعلق زيادة وكل شوية أبدلهم عشن ما تطفش منه
كمان الي أشتريتهم كانواأحسن و أطول من الي موجودين أصلا فحبتهم أكتر


٣- البروجيكتور
هادا أخدتها من مذركير وأنا نفسي ماكنت أعرف أنها قد كدا رائعة
أول شي تتطلع ميوزيك حلو
وكمان تنور من النص وتسوي للبيبي ديسكو فالسرير
و أحلى شي انها كمان بروجيتور وممكن تعمل زي الفيديو كليب فالسقف
بنتي كانت تتفرج عالسقف الين ما تنام
والحلو أنو في ريموت فكل ما يخلص كنت أضغط من مكاني
وكمان ممكن أتحكم بالصوت
مرة أنصح فيها


٤- أي شي يتسحب ديله ويطلع ميوزيك البيبي ينبسط بيه
أنا اشتريت لبنتي من هادي الألعاب مليون حبة
وحدة للسيارة ووحدة للسيارة التانية ووحدة للسرير ووحدة معانا فالشنطة رايحة جاية معانا ووحدة فالصالة
وكلهم هريناهم مشالله


٥- آخر شي الألعاب الي تتعلق فالكرسي حق السيارة والعربية
هادي مررة مهمة عشن تليهم في الخروج ويتسلو عليهم أحسن من ما يتسلو علينا
أنا أخدت كم وحدة من ماماز اند باباز


Tuesday, October 21, 2014

My Favourite Salad Recipe with Balsamic Vinegar Dresssing

ن أنا ما أحب السلطة الي فيها قطع خضار كبيرة وأفضل السلطة الي مليانة أوراق خضراء و مكسرات 



المقادير لهادي السلطة

خس
سبانخ
كزبرة
ممكن جرجير بس أنا أكرهه
نعناع لأنه يعطي نكهة و ريحة ممتازة

طماطم صغيرة
جزر مبشور (أنا ما استخدمته اليوم) من باب التغيير
أڤوكادو
قعقع أمريكي مقطع
صنوبر محمص
سلمون مدخن أو جبنة الفيتا

أحلى شي فالسلطة أنها بسيطة وممكن ينضاف لها أي شي
كمان فيها أشياء لينة و أشياء مقرمشة

 the dressing

كنت دائماً أحاول أزبط البلسميك ڤينيقر بس ما أقدر
المهم أخيرا لقيت الطريقة

كاسة صغيرة زيت زيتون
ربعها خل بلسميك
ملعقة كبيرة ديجون مسترد

ولازم يتخلطو بالخلاط

بالعافية 



Wednesday, October 15, 2014

The Perfect Coated Jeans


ليا فترة وانا أدور على الكوتد جينز وكل الي الاقيه لمعته زايده وشكله رخيص

الكوتد جينز هوا بنطلون في طبقه تلمع كأنه جلد بس مهو جلد

كثير ممثلات يلبوسه و هوا يعطي لوك غير 


هنا مع الصوف يخلي اللوك أشيك

هنا مع لوك مرة بسيط بس برضه يعطي حياة للبس
المهم
انا لقيته فمسيمودوتي بأربعة ألوان: أخضر وأسود وكحلي غامق و عودي
أخدت الكحلي الغامق لانه أحلى بكتير من الأسود وأخدت العودي لأنو مرة عجبني لونه
حبيت مرة الخامة و الفينيش و التفاصيل الصغيرة
كمان مرة يطلع حلو فاللبس و يبين الجسم انحف و مشدود

شيكو على مسيمودوتي لو عجبكم 😘😘😘